sonetung kapampangan: "uling kaluguran da ka"

Wednesday, December 5, 2012

"uling kaluguran da ka"

kakung kaluguran, mikakunu ku man
sinulat ku murin ban ke mung piratan...
-magsaya ku wari king myaring labanan
agyang pang king gera sinambut ta naman?
talastas ding sabla mikalugud kata
-king gubyernu tamu, mupin, kasal naka;
ala kung agawa 'gyang nu naka dala
uling pyesa kang chess manyugud mumuna...
kaluguran daka 'nya mentun kung al'wa...
-balu ku buri mung magin kung masaya;
king pusung likwan mung tiwangwang ke kena,
pakaluguran keng 'lang pamamiraya...
-anting pamamintu king inyad mu kaku
nung keka murung ya gamat ing kalma mu.
-30-

No comments:

Post a Comment

"inya meko ka"

manibat king aldong ing maympis kung gaga
marandam ya inge keti king masala
ot e ku atakman ing yumu mu uma
at ing kawlan mu ku e bitasang gewa.

at angga king aldong marap ku king altar
ban munye kung tangu arap ning Linalang
ala ka siping ku ban damdam mu naman
king dagul ning tulang kakung panamdaman.

ngeni, ing panayan migit na'ng par'minggu
ume ne masala ining kekang apu
e ku rin panayan iyang presensya mu
ban munye sikan lub king pamangayna ku.

obat mangayna ku? nu ku wari manglap?
ita ing king laman nig likwan mung sulat,
mekad isipan mu, king pusung magsalbat
iyang pamanda mu king maplas nang sugat,

dapot ing milyari, ing kanglap dinatang
king sulat mung kan'ta binasa nang tatang
uling atyu karin ing kasasangkanan
obat agawa mung likwan mu kung misan.

swatan da ka wari king gewa mu kaku
uling ding labi mu e ko tikman yumu,
at ala kang pane ban neng payaru ku
takman ku ing paling babye ning salu mu?

e ku akalingwan, ngamu, "mal kung anak,
e me sa' pagkaymut kaku ing patawad
bayu ka migising nung mako kung agad
iti ing patuneng ning lugud kung wagas.

"ninu waring indu ing malwalas salu
nung e ne auma ing sinta nang bunsu
at e ne akawul agyang pinandit mu
uling kaylangan yang makong durug pusu?

"uling ing mako ku 'ya kabud paralan
ban ing kakung lugud kakung aparamdam;
i tatang mu anak, ing kakung lalakwan
a matibeng saksi king nung na'ng katutwan.

"e ku man mu tikman ing magin kung indu,
e man mu mepuyat para king bunsu ku,
e ku murin tikmang sumusu ka kaku,
halus e ku tikman pati pamaglwal mu..."

babasan nang sulat, tiknangan neng tatang,
e ne man inari, lepunggus neng misan
uling lalabug yang keyang panimanman,
pelalung swala na mimina't mangalgal.

inya king sulat mu makibat ku sana
ban lambisan daka't pasalamat keka;
daranum kung mata sana sapat nala,
at maglwang kandila arap mung lapida.

bista man ing kanglap minapun king salu
at pota king landeng delanan mu rugu
ing pamanakbang ku pota mitalabu
at king kelan kalma karin ku manabu.

-30-

"ing asawang lalaki"

king patingapun ku, ing walu nang oras
makatalaga yang pamamigang pawas,
mibabayatnan ku e king keyang bayat
nun’e king kayan na ning bulsang mayayat.

kayapun ning bengi tikal ku katawan
king kaba ning aldong mabilis daralan
dapot matula ku uling mas mapagal
ing bala-balate king babo pagkeran.

deng sasaluran ku king pagal par’minggu
karin king tindahan ‘gad kong didiretsu,
ing palta king bale agad agapan ku,
at e ku ‘yuyuna sariling kaswelu.

pwera kelilwa ku, ring mitagang sukli,
king ustung lulanan karin ko bibili,
sariling kaswelu serya kung tatawli
ban ‘yuna ing angel, at keya kakagli.
-30-

“neng aldo ning sweldu”

istung atyu na la ring bunga ning pagal,
pulayi kong agad karin king tindahan,
ing mangaulaga ampo ing kaylangan
para king pamilya agad kung pantunan:

ngarang manamuyut ding kaluguran ku,
manyaman ing danum maki-ispiritu,
-ing tikal, at bayat ning pupusanan mu
makalimbatawan, iti, siguradu.

agkat kung manwala ing kakung sarili
dapot nanan ku man, alang malilyari
pablasang balu ku ing metung nang boti,
metung kilung abyas ing katimbang niti;

karing kakilala, uling ding mapilan
ing karelang inum istung miparakal
ing karelang dungus akwa nang masabal,
ing anggang laman na itulak nang palwal;

anti yang mibakung ing kekang kaldera
a mitmu pang nasi ‘sung milyari ita,
at king keraklan da ring boting mitomba,
anting pati sabo abeng mibakung na;

iti alang biru, tutung malilyari
istung dakal na la ring mitombang boti,
dumurut ne murin ing kekang kisami,
at mayuyuyut na pelalung tab’reti;

karetang mapilan a kanakung balu,
‘sung mipasoso la mangule nong pasu,
ing pangatau rang anting tupang mamu
magbayu at maging kambing a manyagu.

dapot makanyanman, itang bageng ita
malilyari mu istung mipasobra…
mupin, ding keraklan karing kakilala,
itang mabibitin e ra korsunada.

ing sabong mibakung na’ng pakinabang na
ampo ing miyugseng laman ning kaldera?
-anti mong penyakal batal ding pamilya
A atyu king bale manenaya keka.

-30-

"malaram ya i ma ku"

ing e ku ayntindyan, bat bawal maglaram
samantalang i ma gagawan na naman,
siguru deng matwa, karela e bawal
pero deng malati dapat lang pamargan?

Magumpisa kan’tang ‘la ne I tatang ku,
Ating ald0 muring i Ma ku ala yu,
Daratang ya bengi o kaya ‘bat me’gtu,
Kauli ing talnang mumuna kalderu.

babo ning lamesa, parati ming ulam,
ning nanu neng bengi, neng abak ya' naman;
toyu ampong taba... -taba mu neng misan,
sabong ibat bombang king asin biburan.

neng misan 'ting sagin 'bat king siping bale,
misan ing durwang ra sabo ampong gule;
neng atin nang maus, i Ma tumiman ne,
mangabaldugang ding siping dinan de.

king tulid pisamban menakit kung anak,
maranup ne yata e patugut kikyak,
indu nang kayabe kikyak yang papalad
karing balang tau arap na lalabas...

aganaka ku pin 'nyang e ku pa mengan,
'layu pa i Ma kung meglabada naman,
anakung kalukluk king kekeng lakbangan,
bala mu sisi kung manayang kurukan.

i Ma, ketang misan mangan na ke sana,
aku'ng pekanan na, ngana mabsi ya pa;
alben-alben naku at timan-timan ya,
tatamwal ku kasi uling maranup na...

pinilit keng igkat, e maranup kanu,
ngana aku namu ing mangang dili ku
at kaybat kung mengan peglantang na naku,
"love na love" ne kanu ing keyang bayntau.

ugali na nakung parating pagkanta,
ban agad datangan ning tundu ngana pa;
bala mu bingut ku a patudturan na,
bala mu bingut ku a magberat keya...

bengi, milingat ku at ikit ke i Ma,
magnapnap yang bangi king kekeng kusina,
at sinalikut ku, e pepakit serya
uling king ikit ku kabud naku meglwa;

malaram ya i Ma, e danupan kanu,
nandin e ya bisang mangan kayabe ku,
ala palang keya, binye na ngan kaku
sana binawal Ne nitang Apung Guinu..
-30-

"kayadwanan ning meyangu-bye"

agyang e ya mirugpanan
king trangkasung kule paldas,
anti neng gapus matalik
king mangalunggung a papag
ing salu a pisuswanan
king dalise diling gatas
at pekamatalik dili
a kinawul takde't gamat.

panamdaman na ing lagnat
'gyang e bitasang masanat,
mangalambut ne katawan
dapot pilit tatalakad,
agyang ditak yamu tudtud
anti yang e mapupuyat,
at ding keyang adwang mata
kabukas lang makababad.

ing pamangang makarungut
nu anti man king kanyaman,
masasayang mu ing lasa
king keyang wawang matabang,
agyang nanu ya pa kasigla
ing gakgak ning keyang atyan,
e bitasang darandaman
king bayat na panamdaman.

duruyan na ne ning lilyu,
mapagal ne at maputla,
agyang suklen mu ing bwak na
e na na maybug agawa,
'gyang tikal ne panamdaman
e magreklamung bitasa
sumangid ning ala naku
ban pisandalan nang bagya.

...king kakung swalang tahimik,
minatna at minawus ku
kabang duruku ku nung nu
mekwa larawan ing tau,
"ing bini ning balakang ku
pakiapis king gamat Yu
ban ayan ning kapaldanan
ing salu nu ya sinusu."

-30-

sonetung kapampangan

Wednesday, December 5, 2012

"uling kaluguran da ka"

No comments:

Post a Comment

Followers

"yumu king kapalas"