"uling kaluguran da ka"

kakung kaluguran, mikakunu ku man
sinulat ku murin ban ke mung piratan...
-magsaya ku wari king myaring labanan
agyang pang king gera sinambut ta naman?
talastas ding sabla mikalugud kata
-king gubyernu tamu, mupin, kasal naka;
ala kung agawa 'gyang nu naka dala
uling pyesa kang chess manyugud mumuna...
kaluguran daka 'nya mentun kung al'wa...
-balu ku buri mung magin kung masaya;
king pusung likwan mung tiwangwang ke kena,
pakaluguran keng 'lang pamamiraya...
-anting pamamintu king inyad mu kaku
nung keka murung ya gamat ing kalma mu.
-30-

"ing malukang anak"

sibul no ning grasya retang basurahan
uling karin dagpa ing grasyang daratang
pablasang neng misan, karetang mamangan,
e ra agigisan itang e manyaman;
king tulid pisamban nung nu ku matudtud
dakal karing taung piyadwan kung limus
ating mitatabi, ating mitatapus
at mapilan la mu retang babye lunus;
at karing bilang da retang lepitan ku
atin kung atupan maganakang tau,
ala yaman binye 'gyang sisilyu kaku,
ngana, "patawad di," at kirusan naku,
kalulu ya murin, akit keng 'malan na,
tiniman ya kaku, "may God bless you," ngana.
-30-

"ing manintun"

ing kakung sarili alben ku king dalan
kabang maglakad ku a alang darasnan,
kabang pauli ku a alang ibatan,
kabang mimisip ku a alang isipan.
karing anggang tau ot aku na yata
ing e na sikasung mamawus ning kalma?
inya pin ing bye ku dimut ya king tula,
at nung mayli ku man alang kablang bagya.
ing alben kung aku menikal ne bitis,
mitmung alikabuk sandalyas nang maympis,
ing kaba ning dalan penaswe neng pilit,
pagnasan nang akit pantunang masakit.
mamarsakali yang makatupa barya
ban kanita rugu milamnan ya bulsa.
-30-

batwin at bulan

batwin, batwin, batwin, batwin a kikindat,
bala mu mata lang kaku magmapundat,
lalon ko neng bengi king banwang malwalas
bayu ku magkera't ume king paninap.
kabang kikindat la titiman ya naman
keta king siping da ing malagung bulan
-maragul, malati, mabilug o bangal,
misan malare ya o dilo neng misan.
ila reng magbante neng bengi keng banwa,
ilang kaswelu ra ring kanakung mata
inya neng malulam at paka-pampan la
e ku asaksaksyan ing tima't kindat da.
'nya nung siklod naku bayu ku magkera
makisabing Babo, bukas akit ko sa'.

lugud ning anak

dindam ke ing kwentu a tungkul king matwa
a king sarili nang apu mekyapus ya,
king salu ning anak, ing danup pitda na,
depatan na iti king makabang banwa;
sabage ing tutu, ining mismung anak
iya ing mitustus daptan na ing depat
ban nang panusignan king salu ing kabag
a king pamitata ing pekapanaptas;
pauli ning krimeng depatan ning tatang,
ing dimla ning selda inya keyang tikman;
king siri ning depat inya angga kanan,
king pasbul ning kartel e ra pepaluban:
abalu ning anak, inen ne ing ibpa,
ing kalam king salu, king bye ing pekaba.

ing bosis ding tau yang bosis ning Guinu?

ngara pung mamapse katayang amanu,
dapat yang marandam ing bosis ding tau
uling ing bosis da ya mu naman kanu
itang mayupayang swala na ning Guinu.
isip-isipan ku ustu la pin kaya
nung manyalugsug ka karing kwentung matwa?
nung e king bosis da ring tau kanita
alang alang salang king pun binitin da;
ring makalto swala karing gugulisak
karetang memalen detang mayoridad,
nung e pu merandam ing bageng inyawad
'la sang inosenti a mebusbus palad....
kanita metupad itang maka-ula:
"ring ipus ning sala itbus na lang daya..."
-30-

king anak

potang ing abak na bayu ya pang sapwak,
pilit yang bibiling, manigaral sakab
ban potang byasa ne mayan nyang mikusad
–e maglwat, ring bitis magin no mang apat;
magin neng malikut ing yatu na kan'ta
uling malwalas na itang darasnan na,
lakwas nung ring bitis maging adwa na la
uling milakad ne, mipulayi ya pa;
at potang keng pyalung abubulus mu ne,
karing al'wang anak ban makapakyabe
magsyotu, tambubung o sipa keng parke,
iti ngan pyalung mu* nung ikang lumawe
dapot ing king lub na ning anak ing tutu
babye na king pyalung mabilug nang pusu.
-30-

"keka ne ing queca, kaku ya ing kaku"

inya mu mika-que uli ring kastila,
indam da la letra karelang salita,
ita kanu'yng ustu ngara ring aliwa
itang penandam da karetang banyaga,
dakal la penamdam amanu karela,
ngening panaun mi kapampangan nala,
makananu no man retang elilan da
selawlang amanu e mu kabud letra?
melikid ku agad king aldo ring napun
nung nu bubut la pang bubut ring panaun
dakal karing watas a atyu na awun
pluma la panyulat... -e computer keyboard.
ngeni susulat ku uli ning kompyuter
e ra ku mo kaya kalyan ring magaleng?

"legwan la mu kabud"

nganang minye atul ning metung a mestru
dikil karing "puzzles" a keya pelad ku,
"ot ala lang laman ding pemangawa mu...."
-buri nakung turu nung bisa ku kanu...
linawe ke obra 'tsaka ku tiniman
uling ding gewa na mangasanting la ngan'
'tsaka ku pipiling uli ning katutwan
a ring keyang pyesa kabud la mu legwan..
nung e ka megaral, mekad malibang ka,
e ka mipangisngis karing kabayat da
dapot nung tais ka buntuk king eskwela,
pota murul kamu nung dungdungan mu la..
makananu mu lang dinan pang pakibat
nung e ka man misip a-solve mu neng agad?
-30-

mamun ka o ali?

sakaling balu mung atyu ne malapit
ing daralakitan a kanglapang gulis
uling ding kenu mang daralpak a bitis,
detang lalakwan da maplas lang manangis;
karetang mal keka e mu wari lingad
nung ding tagang oras ditak na lang ditak,
e na la magkasya pilitan mang sukat
ban makapagsadya't malwalas atanggap?
nanu ing daptan mu king kekang kabilyan
nung ala na murin nanu man ing daptan?
mala na ning Malam itang kapanayan
bista man e pihu ing keyang panyatang.
mamin naka kaya at mupul nakang lwa
o 'kaba mu nomu aldong mangasaya?
-30-

ing pamana nang 'ma

agyang pang i tatang agad yang metudtud
king keyang marimla at malukang puntud
makanyan man kang 'ma ala kung utang lub
'gyang pisanan naku a mengaring paud
-ita'yng sinabi na inyang akit na ne
ing bunsu nang apu a kakung pangane,
ngana ing lingap na ampong pamanyese
e utang lub nun'e pimamanang binye;
ngana pa, mayap'ang iyang ating utang,
utang bilang indung dakal pamagkulang,
pamagkulang oras at bageng materyal
ban ing keyang lugud lakwas aparamdam;
ngana ing lugud na pemana na kaku
ban kung apamana karing keyang apu.
-30-

amanung patiuna

king uli ring taung ding mata masala
king tintang daragus king pluma ring al'wa,
kakung aganaka ing meging salita
peuna ning watas king dalit nang gewa.
itang sinabi na e mu pin alingad,
ating Sehismundu bala mu 'nong kayap,
karing kawatasan hilig dang manyamwak
inya malilyari magin lang mabangnas.
inya pin aku man ing mung asabi ku
karing poesya ku, daptan yu'yng buri yu,
kalyan yo't pagsisti, mananu mo kaku
basta e yu la mu tataginan bersu.
uling ding amanu e la amanu mu
nun’e dayang siklu king talagang pusu.
-30-

"kaylangan kung tupad"

misan king uli na ning angin a tityup
a ibat king tau a matsura asbuk,
ing kanakung pusu't mapibabatang lub
ayabluk nang mibwa ing pali ning buntuk;
iting tau murin atyempwan keng misan
-misang ing palang ku bat keng perin' taram,
gagalgal ku gamat, sunde-sape neman,
pinadit melawus miragsa king dalan;
misnuk ku man dapot lepitan keng serya,
kaybat, sinopan keng mibalik a diwa,
e ke pebakalan e map a salita
(yang gewa ku) agyang manggatal ku dila;
king kanakung gewa bisa kung tumutul
dapot kristyanu kung atin ubligasyun.
-30-

istung e ke pa tiknangan

'nyang kan'tang kan'ta pa, ratun ku pisamban,
tula kung magsilbi 'nya meging sakristan;
malinis ku man lub bilang kayanakan
dapot 'tin kung abeng likas ing kalokwan:
misan sangkan nakung selikut a pera
-iti e milingad karing kakung mata
dapot migsangkan ku a abating kula,
layun kung mangilag tuldwan keng daretsa;
'nyang sangkan keng kitnan karing mayayala,
mipatagun namang dintang ya ing kura,
e naku tengwanan, merine ya yata
-melawus ing sangkan, lingad na nang serya.
nan ke pang pangutnan, memamaglingad ne;
dala kya impyernu istung sigiran ke.
-30-

ing kayamanan na ning saradung bale

isip-isipan ku, karing bayung kapsa
ning metung a tagyang a kang Adan mekwa
ot agyang kapilan ali naku yata
makasagana pa keti king masala
a e ra kalupa ring pakabulalag
a amanung seryang pekakayap samas
a mengaring bale a e pakakabat
ring awang da't pasbul -analang kabuklat.
dapot ketang misan 'tin kung akatupa
karing e asahan a kakung akit pa
-warit kabud bale at 'tin kung susi na;
biklat ke 'nyang kaybat ning tangung sagrada.
ngeni ing syam bulan kaku yang panayan,
ing kayamanang 'tyu kilub bayu lumwal.
-30-

bakit dalit ku?

pabustan ku waring ding lilisya nota
ila ring mangangas igale ring rima
uling akakit dang pabustan ke'yng pluma
kabud makasoso king boti ning tinta?
manaya ku waring ding e matni dila
ilang migulisak king kakung salita?
at ding ing balugbug a baug king s'wala
ring mamitang dandam king amanung mutya?
uling nung makanyan anti keng timbunan
ing kakung talentung binye ning Linalang,
nanung keliwan ku king metung alipan,
kitkut ne mu'yng gintu uli ning temaran.
dapot... daralit ku... uli ning lugud ku,
king kalam na ning Dios a sisuang amanu.
-30-

kasnuk karing aliwa

ing kanakung pusu gintu yang lulanan
nung nuku kukunan tintang kapampangan,
e ya makalaksing batingtingan me man
uling nung matni ya, angin yamu laman.
dutung yang mataba ing kanakung pluma
at ing katunayan ane king kabunga,
ring kakung apupul kilub pepabanwa
ating adwang dalan o mekad migit pa.
dapot ating bageng kasnukan kung tutu
ding king pamangambul mailig tuturu,
buri ra kang mandwan, -nung e ku sa' balu
ila king sarili magbibyasa la mu:
kapurit dang pupul, deta namung deta,
e no miragdagan, ketubasan na la.
-30-